ചെറുതോണി:ഇന്ധന വില വർദ്ധനവിനെതിരെ സി പി ഐ നേതൃത്വത്തിൽ പ്രതിഷേധ പ്രകടനം നടത്തി. തുടർന്ന് പൈനാവിൽ നടത്തിയ ധർണ്ണ സി പി ഐ ദേശീയ കൗൺസിൽ അംഗം ടി ജെ ആഞ്ചലോസ് ഉദ്ഘാടനം ചെയ്തു. ഇന്ധന വില വർദ്ധനവിനെ തുടർന്ന് 

നിത്യോപയോഗ സാധനങ്ങളുടെ വില വൻ തോതിൽ വർദ്ധിക്കുകയും ജനജീവിതം ദുസ്സഹമാകുകയും ചെയ്തിട്ടും കേന്ദ്ര സംസ്ഥാന സർക്കാരുകൾ നിസ്സംഗത പാലിക്കുകയാണെന്ന് അദ്ദേഹം കുറ്റപ്പെടുത്തി. എണ്ണ കമ്പനികൾക്ക് വൻ തോതിലുള്ള ലാഭത്തിന് കേന്ദ്ര സർക്കാർ കൂട്ട് നിൽക്കുകയാണെന്ന് അദ്ദേഹം പറഞ്ഞു. കേന്ദ്ര സംസ്ഥാന സർക്കാരുകൾ പെട്രോളിയം ഉൽപ്പന്നങ്ങൾക്ക് മേൽ ചുമത്തുന്ന നികുതിയിൽ ഇളവ് നൽകി ജനങ്ങൾക്ക് ആശ്വാസം നൽകണമെന്ന് അദ്ദേഹം ആവശ്യപ്പെട്ടു.

ജില്ലാ സെക്രട്ടറി കെ സലിം കുമാർ അദ്ധ്യക്ഷനായിരുന്നു. വി ആർ ശശി, എം കെ പ്രിയൻ ജോസ് ഫിലിപ്പ്, സി യു ജോയി, ജയാ മധു, വി കെ ധനപാലൻ, ടി ഗണേശൻ , ടി ആർ ബിനു എന്നിവർ പ്രസംഗിച്ചു.